​മാസ്കും ഹെൽമറ്റും ധരിച്ചെത്തി വീട്ടിൽ അതിക്രമിച്ചു കയറി വൃദ്ധയുടെ മാല പൊട്ടിച്ചു പ്രതി അറസ്റ്റിൽ

നെടുമ്പാശ്ശേരിയിൽ വയോധികയെ ആക്രമിച്ച് മാല കവർന്ന കേസിൽ പ്രതി പിടിയിൽ

നെടുമ്പാശ്ശേരി: അത്താണി ഭാഗത്ത് വയോധികയായ സ്ത്രീയെ വീടിനുള്ളിൽ ആക്രമിച്ച് കഴുത്തിൽ കിടന്ന സ്വർണ്ണമാല കവർച്ച ചെയ്ത കേസിൽ പ്രതി പോലീസ് പിടിയിലായി. അങ്കമാലി പുളിയനം സൗപർണികയിൽ ശരത് മാധവൻ (42) നെയാണ് ആലുവ ഡി.വൈ.എസ്.പി ബൈജു പൗലോസിന്റെ നേതൃത്വത്തിലുള്ള പ്രത്യേക അന്വേഷണ സംഘം അറസ്റ്റ് ചെയ്തത്.

​കഴിഞ്ഞ മാസം 30-ന് വൈകീട്ടായിരുന്നു കേസിനാസ്പദമായ സംഭവം. മാസ്കും ഹെൽമറ്റും ധരിച്ചെത്തിയ പ്രതി, വീടിന്റെ അടുക്കളയിൽ നിൽക്കുകയായിരുന്ന വൃദ്ധയുടെ മുഖം തുണികൊണ്ട് മൂടിയ ശേഷം കഴുത്തിലെ സ്വർണ്ണമാല ബലമായി പൊട്ടിച്ചെടുക്കുകയായിരുന്നു. തുടർന്ന് ഇവരെ ശുചിമുറിയിലേക്ക് തള്ളിയിട്ട് പുറത്തുനിന്ന് പൂട്ടി രക്ഷപ്പെടുകയും ചെയ്തു.

​സംഭവത്തെ തുടർന്ന് എറണാകുളം ജില്ലാ പോലീസ് മേധാവി കെ.എസ്. സുദർശന്റെ മേൽനോട്ടത്തിൽ പ്രത്യേക അന്വേഷണ സംഘം രൂപീകരിച്ചു. പ്രദേശത്തെയും സമീപ വഴികളിലെയും തൊണ്ണൂറോളം സി.സി.ടി.വി (CCTV) ക്യാമറ ദൃശ്യങ്ങൾ കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിനൊടുവിലാണ് പ്രതിയെക്കുറിച്ച് സൂചന ലഭിച്ചത്. സംശയിക്കുന്ന നിരവധി പേരെ ചോദ്യം ചെയ്യുകയും ജില്ലയ്ക്ക് പുറത്തേക്കും അന്വേഷണം വ്യാപിപ്പിക്കുകയും ചെയ്തിരുന്നു.

​തുടർന്ന് പുളിയനത്തുള്ള സ്വന്തം വീട്ടിൽ നിന്നാണ് പ്രതിയെ പോലീസ് കസ്റ്റഡിയിലെടുത്തത്. കവർന്ന സ്വർണ്ണമാല സ്വകാര്യ ധനകാര്യ സ്ഥാപനത്തിൽ പണയം വെച്ചതായി ചോദ്യം ചെയ്യലിൽ ഇയാൾ സമ്മതിച്ചിട്ടുണ്ട്.

​ആലുവ ഡി.വൈ.എസ്.പി ബൈജു പൗലോസ്, സി.ഐ ബി.കെ. അരുൺ, എസ്.ഐ ജെ. ജോഷി, സി.പി.ഒമാരായ മാഹിൻഷാ അബൂബക്കർ, കെ.എം. മനോജ്, എം.എസ്. ശ്രീരാജ്, മുഹമ്മദ് ഷാഹിൻ, എസ്. ഷമീൻ, അനിൽജിത്, കൂടാതെ ഡാൻസാഫ് (DANSAF) ടീം അംഗങ്ങൾ എന്നിവരടങ്ങുന്ന സംഘമാണ് പ്രതിയെ പിടികൂടിയത്.