ശബരിമല കാലത്ത് പച്ചക്കറി വിലക്കയറ്റം തടയാൻ വിപണി ഇടപെടൽ നെൽകർഷകർക്ക് 1051 കോടി നൽകിയെന്ന് മന്ത്രി ടി. സിദ്ദിഖ്
ശബരിമല കാലത്ത് അവശ്യസാധനങ്ങളുടെ വിലക്കയറ്റം തടയാൻ കൃഷിവകുപ്പ് വിപണി ഇടപെടൽ നടത്തുമെന്ന് മന്ത്രി ടി. സിദ്ദിഖ്. നാളികേര പുനരുജ്ജീവന പദ്ധതി സെപ്റ്റംബർ 2 മുതൽ ആരംഭിക്കുമെന്നും കോഴിക്കോട് കുറ്റ്യാടിയിൽ നാളികേര പാർക്ക് സ്ഥാപിക്കാൻ കേന്ദ്രവുമായി ചർച്ച നടത്തിയതായും മന്ത്രി വ്യക്തമാക്കി.
Angel Varghese 
പച്ചക്കറി വിലക്കയറ്റം തടയാൻ ശബരിമല കാലത്തും ശക്തമായ വിപണി ഇടപെടൽ നടത്തും: മന്ത്രി ടി. സിദ്ദിഖ്
കോഴിക്കോട്: വരാനിരിക്കുന്ന ശബരിമല കാലത്തും മറ്റ് ഉത്സവ സീസണുകളിലും പച്ചക്കറികളുടെയും മറ്റ് അവശ്യസാധനങ്ങളുടെയും കൃത്രിമ വിലക്കയറ്റവും ഇടനിലക്കാരുടെ ചൂഷണവും തടയുന്നതിന് സംസ്ഥാന കൃഷിവകുപ്പ് ശക്തമായ വിപണി ഇടപെടൽ നടത്തുമെന്ന് കൃഷി വകുപ്പ് മന്ത്രി ടി. സിദ്ദിഖ് അറിയിച്ചു. കോഴിക്കോട് ഗവൺമെന്റ് ഗസ്റ്റ് ഹൗസിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
കഴിഞ്ഞ മൂന്ന് മാസത്തിനിടെ നെൽകർഷകർക്ക് 1,051.34 കോടി രൂപ സർക്കാർ നൽകിയതായി മന്ത്രി പറഞ്ഞു. ബാക്കിയുള്ള തുകയും ഉടൻ തന്നെ കർഷകരിലേക്ക് എത്തിക്കും. വരാനിരിക്കുന്ന ഒന്നാം വിള നെല്ല് സംഭരണം കാര്യക്ഷമമാക്കാൻ കൃഷി വകുപ്പും സിവിൽ സപ്ലൈസ് വകുപ്പും ചേർന്ന് ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്നും, കർഷകർക്ക് സമയബന്ധിതമായി തുക ഉറപ്പാക്കുന്ന രീതി തുടരുമെന്നും മന്ത്രി വ്യക്തമാക്കി.
മികച്ച നേട്ടവുമായി ഓണസമൃദ്ധി കർഷകച്ചന്തകൾ
ഓണക്കാലത്ത് സംഘടിപ്പിച്ച ഓണസമൃദ്ധി കർഷകച്ചന്തകൾ വഴി പൂർണ്ണമായും ഡിജിറ്റൽ സംവിധാനം (കതിർ ആപ്പ്) പ്രയോജനപ്പെടുത്തി മികച്ച രീതിയിൽ വിപണനം നടത്തുവാൻ സാധിച്ചു. ഹോർട്ടികോർപ്പ് കർഷകരിൽ നിന്ന് ശേഖരിച്ച ഉൽപ്പന്നങ്ങളുടെ തുക മുഴുവനായും നൽകിക്കഴിഞ്ഞു. സാങ്കേതിക തടസ്സങ്ങളിൽ പെട്ട 202 കർഷകരുടെ 3.09 ലക്ഷം രൂപ ഈ ആഴ്ച തന്നെ അക്കൗണ്ടുകളിൽ നിക്ഷേപിക്കും.
സംസ്ഥാനത്തുടനീളമുള്ള 2,000 കർഷകച്ചന്തകൾ വഴി 2 ലക്ഷത്തിലധികം ടൺ ഉൽപ്പന്നങ്ങളാണ് വിതരണം ചെയ്തത്. 14.25 കോടി രൂപ വിപണിമൂല്യമുള്ള പച്ചക്കറികൾ 2,94,785 ഉപഭോക്താക്കളിലേക്ക് എത്തിക്കാനും 14,212 കർഷകർക്ക് ഇതിന്റെ നേരിട്ടുള്ള ഗുണം ലഭ്യമാക്കാനും സാധിച്ചു. ഓണച്ചന്തകൾ വഴി സബ്സിഡി കഴിച്ച് 8.98 കോടി രൂപയുടെ വിറ്റുവരവുണ്ടായതായും മന്ത്രി കൂട്ടിച്ചേർത്തു.
കേരോത്സവവും സമഗ്ര നാളികേര പുനരുജ്ജീവന പദ്ധതിയും
സെപ്റ്റംബർ 2-ലെ ലോക നാളികേര ദിനത്തിൽ തിരുവനന്തപുരം വഴുതക്കാട് കാർമൽ കൺവെൻഷൻ സെന്ററിൽ സംസ്ഥാനതല കേരോത്സവം സംഘടിപ്പിക്കും. മുഖ്യമന്ത്രി വി.ഡി. സതീശൻ പരിപാടി ഉദ്ഘാടനം ചെയ്യും. നാളികേര ഉത്പാദനത്തിൽ കേരളത്തെ വീണ്ടും മുൻനിരയിലെത്തിക്കാൻ ലക്ഷ്യമിടുന്ന സമഗ്ര നാളികേര പുനരുജ്ജീവന പദ്ധതിക്ക് കേരോത്സവത്തിൽ രൂപം നൽകും.
കോഴിക്കോട് കുറ്റ്യാടിയിൽ നാളികേര പാർക്ക് ഉൾപ്പെടെയുള്ള വികസന പദ്ധതികൾ ആവിഷ്കരിക്കുന്നതിനായി കേന്ദ്ര കൃഷിമന്ത്രി ശിവരാജ് സിങ് ചൗഹാനുമായി പ്രാഥമിക ചർച്ചകൾ പൂർത്തിയാക്കിയതായും തുടർന്നുള്ള നടപടികൾ വേഗത്തിലാക്കുമെന്നും മന്ത്രി അറിയിച്ചു.
