ഭൂതത്താൻകെട്ട് അണക്കെട്ടിന്റെ ഷട്ടറുകൾ തുറന്നു പെരിയാർ തീരത്ത് ജാഗ്രതാ നിർദ്ദേശം, സംസ്ഥാനത്ത് വിവിധ നദികളിൽ അലർട്ട്

മൂവാറ്റുപുഴ : പെരിയാറിന്റെ വൃഷ്ടി പ്രദേശത്ത് ശക്തമായ മഴ തുടരുന്നതിനെ തുടർന്ന് ഭൂതത്താൻകെട്ട് അണക്കെട്ടിലേക്കുള്ള ജലപ്രവാഹം വർദ്ധിച്ചു. റിസർവോയറിലെ ജലനിരപ്പ് സുരക്ഷിതമായ അളവിൽ നിലനിർത്തുന്നതിന്റെ ഭാഗമായി ഭൂതത്താൻകെട്ട് ബാരേജിന്റെ ഷട്ടറുകൾ ഉയർത്തിയിട്ടുണ്ട്.

​ആകെയുള്ള 15 ഷട്ടറുകളിൽ 14 എണ്ണവുമാണ് നിലവിൽ തുറന്നിട്ടുള്ളത്. ഇതിൽ 12 ഷട്ടറുകൾ അഞ്ച് മീറ്റർ വീതവും 2 എണ്ണം ആറു മീറ്റർ വീതവുമാണ് ഉയർത്തിയിരിക്കുന്നത്. ബാരേജിൽ നിന്ന് വെള്ളം ഒഴുകിയെത്താൻ സാധ്യതയുള്ളതിനാൽ പെരിയാറിന്റെ തീരപ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്ന് പെരിയാർ വാലി ഇറിഗേഷൻ പ്രൊജക്ട് അസിസ്റ്റന്റ് എക്സിക്യൂട്ടീവ് എൻജിനീയർ അറിയിച്ചു.

​വിവിധ നദികളിൽ ജലനിരപ്പ് ഉയരുന്നു; ഓറഞ്ച്, മഞ്ഞ അലർട്ടുകൾ

​നദികളിലെ ജലനിരപ്പ് അപകടകരമായ രീതിയിൽ ഉയരുന്നതിനെ തുടർന്ന് സംസ്ഥാന ജലസേചന വകുപ്പ് വിവിധ ജില്ലകളിൽ ജാഗ്രതാ മുന്നറിയിപ്പ് പ്രഖ്യാപിച്ചു.

​ഓറഞ്ച് അലർട്ട് പ്രഖ്യാപിച്ചിട്ടുള്ള നദികൾ:

​എറണാകുളം: മൂവാറ്റുപുഴ (തൊടുപുഴ സ്റ്റേഷൻ)

​കൊല്ലം: കല്ലട (പുനലൂർ സ്റ്റേഷൻ)

​കോട്ടയം: മീനച്ചിൽ (പാല സ്റ്റേഷൻ), മണിമല (മണിമല സ്റ്റേഷൻ)

​പത്തനംതിട്ട: പമ്പ (കുരുടമണ്ണിൽ സ്റ്റേഷൻ), അച്ചൻകോവിൽ (കല്ലേലി സ്റ്റേഷൻ)

​മഞ്ഞ അലർട്ട് പ്രഖ്യാപിച്ചിട്ടുള്ള നദികൾ:

​എറണാകുളം: മൂവാറ്റുപുഴ (കക്കടശേരി സ്റ്റേഷൻ)

​കർശന നിർദ്ദേശങ്ങൾ

​യാതൊരു കാരണവശാലും മേൽപ്പറഞ്ഞ നദികളിൽ ഇറങ്ങാനോ നദി മുറിച്ചു കടക്കാനോ പാടില്ലെന്ന് അധികൃതർ മുന്നറിയിപ്പ് നൽകി. നദികളുടെ തീരത്തോട് ചേർന്ന് താമസിക്കുന്നവർ അതീവ ജാഗ്രത പാലിക്കണം. അധികൃതരുടെ നിർദ്ദേശാനുസരണം വെള്ളപ്പൊക്ക സാധ്യതയുള്ളടങ്ങളിൽ നിന്ന് മാറി താമസിക്കാൻ പൊതുജനങ്ങൾ തയ്യാറാകേണ്ടതാണ്.