ടീം എറണാകുളത്തിന് അഭിമാന നേട്ടം തിരഞ്ഞെടുപ്പ് ഉദ്യോഗസ്ഥരെ അഭിനന്ദിച്ച് ജില്ലാ കളക്ടർ
എറണാകുളം നിയമസഭാ തിരഞ്ഞെടുപ്പ് വിജയകരമായി പൂർത്തിയാക്കിയ ഉദ്യോഗസ്ഥരെ ജില്ലാ കളക്ടർ ജി. പ്രിയങ്ക അഭിനന്ദിച്ചു. പാഴ്വസ്തുക്കൾ കൊണ്ട് നിർമ്മിച്ച ഉപഹാരങ്ങൾ ചടങ്ങിൽ വിതരണം ചെയ്തു
അനില എം കൃഷ്ണൻ 
ടീം എറണാകുളത്തിന്റെ വിജയം: തിരഞ്ഞെടുപ്പ് ഉദ്യോഗസ്ഥരെ അഭിനന്ദിച്ച് ജില്ലാ കളക്ടർ; പാഴ്വസ്തുക്കളിൽ നിന്ന് നിർമ്മിച്ച ഉപഹാരങ്ങൾ വിതരണം ചെയ്തു
കൊച്ചി: ജില്ലയിലെ നിയമസഭാ തിരഞ്ഞെടുപ്പ് നടപടിക്രമങ്ങൾ കുറ്റമറ്റ രീതിയിൽ പൂർത്തിയാക്കിയ ഉദ്യോഗസ്ഥരെ അഭിനന്ദിച്ച് ജില്ലാ കളക്ടർ ജി. പ്രിയങ്ക. ഒരു ടീം ആയി ഒത്തൊരുമയോടെ പ്രവർത്തിച്ചതാണ് ഈ വിജയത്തിന് പിന്നിലെന്ന് കളക്ടർ പറഞ്ഞു. കളക്ടറേറ്റ് കോൺഫറൻസ് ഹാളിൽ നടന്ന പ്രത്യേക ചടങ്ങിൽ ഉദ്യോഗസ്ഥർക്ക് പ്രശസ്തിപത്രവും ഉപഹാരങ്ങളും വിതരണം ചെയ്തു.
എസ്.ഐ.ആർ കഴിഞ്ഞുള്ള ആദ്യ തിരഞ്ഞെടുപ്പായിരുന്നിട്ടും, വളരെ കുറഞ്ഞ സമയത്തിനുള്ളിൽ മികച്ച രീതിയിലുള്ള പ്രവർത്തനങ്ങളാണ് ജില്ലയിൽ കാഴ്ചവെച്ചത്. പുതിയ മാറ്റങ്ങൾ ഉൾക്കൊണ്ട് എല്ലാ വകുപ്പുകളും ഒരേ മനസോടെ പ്രവർത്തിച്ചതുകൊണ്ടാണ് തിരഞ്ഞെടുപ്പ് പ്രക്രിയ സുഗമമായതെന്ന് ജില്ലാ തിരഞ്ഞെടുപ്പ് ഓഫീസർ കൂടിയായ കളക്ടർ വ്യക്തമാക്കി.
മാതൃകയായി പുനരുപയോഗ ഉപഹാരങ്ങൾ
തിരഞ്ഞെടുപ്പ് പ്രവർത്തനങ്ങളുടെ ഭാഗമായി ഉണ്ടായ പാഴ്വസ്തുക്കൾ പുനരുപയോഗം ചെയ്ത് നിർമ്മിച്ച പ്രത്യേക ചെടിച്ചട്ടികളും ഇൻഡോർ പ്ലാന്റുകളുമാണ് ഉദ്യോഗസ്ഥർക്ക് ഉപഹാരമായി നൽകിയത്. ഇത് പരിസ്ഥിതി സൗഹൃദമായ വലിയൊരു സന്ദേശമാണെന്നും, ഇത്തരം ഉപഹാരങ്ങൾ തിരഞ്ഞെടുപ്പ് കമ്മീഷനും എത്തിച്ചു നൽകുമെന്നും കളക്ടർ അറിയിച്ചു.
റിട്ടേണിംഗ് ഓഫീസർമാർ, അസിസ്റ്റന്റ് റിട്ടേണിംഗ് ഓഫീസർമാർ, നോഡൽ ഓഫീസർമാർ എന്നിവർ ചടങ്ങിൽ ആദരം ഏറ്റുവാങ്ങി. ചടങ്ങിൽ അഡീഷണൽ ജില്ലാ മജിസ്ട്രേറ്റ് ഷൈജു പി. ജേക്കബ്, ഇലക്ഷൻ ഡെപ്യൂട്ടി കളക്ടർ എ. എസ് ശ്രീകല എന്നിവരും പങ്കെടുത്തു. തിരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയ കളക്ടറെ ഉദ്യോഗസ്ഥർ പൊന്നാട അണിയിച്ച് ആദരിച്ചു.
