ഹോംസ്റ്റേ മേഖലയ്ക്ക് ഉണർവേകാൻ കേരള ഗ്രാമീണ ബാങ്കിന്റെ വായ്പാ പദ്ധതി
കേരളത്തിലെ ഹോംസ്റ്റേ മേഖലയ്ക്കും ഗ്രാമീണ ടൂറിസത്തിനും കരുത്തേകാൻ കേരള ഗ്രാമീണ ബാങ്ക് പുതിയ വായ്പാ പദ്ധതി അവതരിപ്പിക്കുന്നു. ജൂലൈ 23 ന് എറണാകുളത്ത് നടക്കുന്ന ചടങ്ങിൽ ടൂറിസം മന്ത്രി പി. സി. വിഷ്ണുനാഥ് പദ്ധതി ഉദ്ഘാടനം ചെയ്യും
അനില എം കൃഷ്ണൻ 
ഹോംസ്റ്റേ മേഖലയ്ക്ക് ഉണർവേകാൻ കേരള ഗ്രാമീണ ബാങ്കിന്റെ വായ്പാ പദ്ധതി; ഉദ്ഘാടനം ജൂലൈ 23-ന്
കൊച്ചി: സംസ്ഥാനത്തെ ഗ്രാമീണ ടൂറിസം മേഖലയ്ക്കും ഹോംസ്റ്റേ സംരംഭകർക്കും പുതിയ പ്രതീക്ഷയേകി കേരള ഗ്രാമീണ ബാങ്കിന്റെ പ്രത്യേക വായ്പാ പദ്ധതി വരുന്നു. ഹോംസ്റ്റേ മേഖലയെ കൂടുതൽ ശക്തിപ്പെടുത്തുന്നതിനായി നടപ്പിലാക്കുന്ന ഈ പദ്ധതിയുടെ സംസ്ഥാനതല ഉദ്ഘാടനം ടൂറിസം വകുപ്പ് മന്ത്രി പി. സി. വിഷ്ണുനാഥ് നിർവഹിക്കും. ജൂലൈ 23-ന് രാവിലെ 10.30-ന് എറണാകുളം ബി.ടി.എച്ച് ഹോട്ടലിൽ വെച്ചാണ് ഉദ്ഘാടന ചടങ്ങ് നടക്കുക.
കേരള ഹോംസ്റ്റേ ആൻഡ് ടൂറിസം സൊസൈറ്റിയുമായി (Kerala HATS) സഹകരിച്ചാണ് കേരള ഗ്രാമീണ ബാങ്ക് ഈ പദ്ധതി നടപ്പിലാക്കുന്നത്. ഹോംസ്റ്റേകളുടെ അടിസ്ഥാന സൗകര്യ വികസനം, മുറികളുടെ ആധുനികീകരണം, പുതിയ ഹോംസ്റ്റേ യൂണിറ്റുകൾ ആരംഭിക്കൽ, നിലവിലുള്ള സംരംഭങ്ങളുടെ വിപുലീകരണം എന്നിവയ്ക്കായി ഈ പദ്ധതിയിലൂടെ ആകർഷകമായ വായ്പകൾ ലഭ്യമാക്കുമെന്ന് കേരള ഹോംസ്റ്റേ ആൻഡ് ടൂറിസം സൊസൈറ്റി സംസ്ഥാന ചെയർമാൻ എം. പി. ശിവദത്തൻ അറിയിച്ചു.
ഗ്രാമീണ മേഖലയിലെ സ്വയംതൊഴിൽ സാധ്യതകൾ വർദ്ധിപ്പിക്കുന്നതിനും പ്രാദേശിക ടൂറിസം വികസനത്തിനും പുതിയ പദ്ധതി വലിയ ഊർജ്ജം പകരുമെന്നാണ് വിലയിരുത്തപ്പെടുന്നത്.
നേരിട്ട് രജിസ്റ്റർ ചെയ്യാം
പദ്ധതിയിലൂടെ വായ്പ ലഭിക്കാൻ താൽപര്യമുള്ള ഹോംസ്റ്റേ സംരംഭകർക്ക് ഉദ്ഘാടന ചടങ്ങിൽ പങ്കെടുത്ത് നേരിട്ട് പേര് രജിസ്റ്റർ ചെയ്യാവുന്നതാണ്. ഇങ്ങനെ രജിസ്റ്റർ ചെയ്യുന്നവർക്ക് വായ്പയുടെ വിശദാംശങ്ങളും അപേക്ഷാ നടപടികളും കേരള ഗ്രാമീണ ബാങ്ക് അധികൃതർ നേരിട്ട് വിശദീകരിച്ചു നൽകും.
ചടങ്ങിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള ഹോംസ്റ്റേ സംരംഭകർ, ടൂറിസം രംഗത്തെ പ്രമുഖർ, കേരള ഗ്രാമീണ ബാങ്ക് പ്രതിനിധികൾ, ജനപ്രതിനിധികൾ, വിവിധ സർക്കാർ വകുപ്പുകളിലെ ഉദ്യോഗസ്ഥർ എന്നിവർ പങ്കെടുക്കും.
കൂടുതൽ വിവരങ്ങൾക്കും രജിസ്ട്രേഷനും:
കേരള ഹോംസ്റ്റേ ആൻഡ് ടൂറിസം സൊസൈറ്റി (Kerala HATS)
ഫോൺ നമ്പർ: 93492 53124
