ഇ മാലിന്യത്തിൽ വിരിഞ്ഞ അത്ഭുതം ഇന്ത്യയിലെ ആദ്യ സൈബർ ട്രോജൻ ഹോഴ്‌സ് കൊച്ചിയിൽ

ഇന്ത്യയിലെ ആദ്യ സൈബർ ട്രോജൻ ഹോഴ്‌സ് കൊച്ചിയിൽ അനാവരണം ചെയ്തു

​കൊച്ചി: ഡിജിറ്റൽ ലോകത്തെ ഒളിഞ്ഞിരിക്കുന്ന ഭീഷണികൾക്കെതിരെ ശക്തമായ ബോധവൽക്കരണ സന്ദേശവുമായി ഇന്ത്യയിലെ ആദ്യത്തെ സൈബർ ട്രോജൻ ഹോഴ്‌സ് കൊച്ചിയിൽ അനാവരണം ചെയ്തു. 'ദി ട്രോജൻ പ്രോജക്ട്™' എന്ന് നാമകരണം ചെയ്തിരിക്കുന്ന ഈ ബൃഹത്തായ ഇൻസ്റ്റലേഷൻ c0c0n 2026 അന്താരാഷ്ട്ര സൈബർ സുരക്ഷാ സമ്മേളനത്തിന്റെ ഭാഗമായാണ് പുറത്തിറക്കിയത്. ആഭ്യന്തര-വിജിലൻസ് വകുപ്പ് മന്ത്രി രമേശ് ചെന്നിത്തല കൊച്ചി ബോൾഗാട്ടിയിലെ ഗ്രാൻഡ് ഹയാത്തിൽ വെച്ച് ശിൽപത്തിന്റെ അനാവരണം നിർവ്വഹിച്ചു.

​കേരള പൊലീസും ഇൻഫർമേഷൻ സെക്യൂരിറ്റി റിസർച്ച് അസോസിയേഷനും (ISRA) സംയുക്തമായി സംഘടിപ്പിക്കുന്ന c0c0n സമ്മേളനത്തിന്റെ 19-ാമത് പതിപ്പിലെ പ്രധാന ആകർഷണമായി ഈ നിർമ്മിതി മാറി.

​കലയും സാങ്കേതികവിദ്യയും ഇ-വേസ്റ്റും സമന്വയിച്ച അത്ഭുതം

​പ്രശസ്ത ശിൽപി ഡാവിഞ്ചി സുരേഷാണ് 25 അടി ഉയരവും ഏകദേശം രണ്ട് ടൺ ഭാരവുമുള്ള ഈ കൂറ്റൻ ട്രോജൻ കുതിരയെ നിർമ്മിച്ചത്. ഉപേക്ഷിക്കപ്പെട്ട മദർബോർഡുകൾ, പ്രോസസറുകൾ, സർക്യൂട്ട് ബോർഡുകൾ, കേബിളുകൾ എന്നിവയുൾപ്പെടെ 850-ഓളം ഇലക്ട്രോണിക് മാലിന്യങ്ങൾ (E-waste) ഉപയോഗിച്ചാണ് ശിൽപം തയ്യാറാക്കിയിരിക്കുന്നത്. ലോകത്തിലെ തന്നെ ഏറ്റവും ഉയരം കൂടിയ സൈബർ സുരക്ഷാ കലാസൃഷ്ടിയായി ഇത് കണക്കാക്കപ്പെടുന്നു. പരിസ്ഥിതി സൗഹൃദമായ ഇ-വേസ്റ്റ് പുനരുപയോഗ സന്ദേശവും ഈ കലാസൃഷ്ടി മുന്നോട്ടുവെക്കുന്നു.

​ഡിജിറ്റൽ ജാഗ്രതയുടെ സന്ദേശം

​പുറമെ നിരുപദ്രവകരമെന്ന് തോന്നിക്കുന്ന ആപ്പുകൾക്കും സന്ദേശങ്ങൾക്കും ഉള്ളിൽ അപകടകരമായ സൈബർ ഭീഷണികൾ ഒളിഞ്ഞിരിക്കാം എന്ന മുന്നറിയിപ്പാണ് ശിൽപം നൽകുന്നത്. മാൽവെയർ, ഫിഷിങ്, വ്യാജ ആപ്ലിക്കേഷനുകൾ, സാമ്പത്തിക തട്ടിപ്പുകൾ എന്നിവയ്‌ക്കെതിരെ പൊതുജനങ്ങളിൽ ജാഗ്രത വളർത്തുകയാണ് പ്രോജക്ടിന്റെ ലക്ഷ്യം.

​കുട്ടികളുടെ ഓൺലൈൻ സുരക്ഷയ്ക്ക് 'ചൈൽഡ്‌ലൈറ്റ്' സഹകരണം

​എഡിൻബറോ സർവകലാശാലയ്ക്ക് കീഴിലുള്ള 'ചൈൽഡ്‌ലൈറ്റ് – ഗ്ലോബൽ ചൈൽഡ് സേഫ്റ്റി ഇൻസ്റ്റിറ്റ്യൂട്ടുമായി' സഹകരിച്ച് കുട്ടികളുടെ ഓൺലൈൻ സുരക്ഷയ്ക്കായുള്ള ആഗോള പ്രചാരണവും പദ്ധതിയുടെ ഭാഗമായി നടക്കും. ലോകമെമ്പാടുമായി പ്രതിവർഷം 30 കോടിയിലധികം കുട്ടികൾ ഓൺലൈൻ ലൈംഗിക ചൂഷണങ്ങൾക്കും ദുരുപയോഗങ്ങൾക്കും ഇരയാകുന്നുണ്ടെന്നാണ് ചൈൽഡ്‌ലൈറ്റിന്റെ പഠനങ്ങൾ വ്യക്തമാക്കുന്നത്. ഓൺലൈൻ ഗ്രൂമിങ്, സെക്‌സ്റ്റോർഷൻ തുടങ്ങിയ വിപത്തുകൾക്കെതിരെ ബോധവൽക്കരണം ശക്തമാക്കുകയാണ് ഈ പങ്കാളിത്തത്തിലൂടെ ലക്ഷ്യമിടുന്നത്.

​കേരള പൊലീസ് മേധാവി രവാഡ ആസാദ് ചന്ദ്രശേഖർ ഐ.പി.എസ്., കേന്ദ്ര ഡെപ്യൂട്ടി ദേശീയ സുരക്ഷാ ഉപദേഷ്ടാവ് ടി. വി. രവീന്ദ്രൻ, എസ്.ബി.ഐ. ചെയർമാൻ ചല്ല ശ്രീനിവാസുലു സെറ്റി, കേരള വിജിലൻസ് ഡയറക്ടർ മനോജ് എബ്രഹാം ഐ.പി.എസ്. തുടങ്ങിയ പ്രമുഖരും ചടങ്ങിൽ പങ്കെടുത്തു.

​സമ്മേളനം അവസാനിച്ചാലും പൊതുജനങ്ങൾക്കും സ്കൂൾ-കോളേജ് വിദ്യാർഥികൾക്കും പഠനത്തിനും ബോധവൽക്കരണത്തിനുമായി സൈബർ ട്രോജൻ ഹോഴ്‌സ് കൊച്ചിയിൽ സ്ഥിരം സ്മാരകമായി നിലനിർത്തും.