യുവാവിനെ തലകീഴായി നിലത്തടിച്ച് കൊലപ്പെടുത്തി സിപിഎം അംഗം ഉൾപ്പെടെ 6 പേർ അറസ്റ്റിൽ

​മണിമലയിൽ മദ്യപാനത്തിനിടെ തർക്കം; എരുമേലി സ്വദേശിയെ തലകീഴായി നിലത്തടിച്ച് കൊലപ്പെടുത്തി, പഞ്ചായത്തംഗം അടക്കം 6 പേർ അറസ്റ്റിൽ

​മണിമല (കോട്ടയം): എരുമേലി എസ്റ്റേറ്റ് സ്വദേശി വൈക്കുന്നേൽ വീട്ടിൽ ഷിബുഖാനെ (48) അതിക്രൂരമായി മർദിച്ചു കൊലപ്പെടുത്തിയ കേസിൽ സിപിഎം പഞ്ചായത്ത് അംഗം ഉൾപ്പെടെ ആറു പേരെ മണിമല പൊലീസ് അറസ്റ്റ് ചെയ്തു. മണിമല അഞ്ചാം വാർഡ് പഞ്ചായത്തംഗം ജോജി ജോൺ (ജോപ്പൻ - 43), നിഖിൽ അയ്യപ്പൻ (25), ഷൈബിൻ സാം (26), അമൽ രാജ് (19), ജോബിൻ രാജൻ (28), കിരൺ (21) എന്നിവരാണ് അറസ്റ്റിലായത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

​കഴിഞ്ഞ 16-ന് രാവിലെ 11 ഓടെയാണ് ഷിബുഖാനെ കറിക്കാട്ടൂർ അമ്പാട്ടുനഗറിനു സമീപത്തെ റബർത്തോട്ടത്തിൽ മരിച്ച നിലയിൽ പ്രദേശവാസികൾ കണ്ടെത്തിയത്. പൊലീസിന്റെ പ്രാഥമിക അന്വേഷണത്തിൽ സംഭവം അതിക്രൂരമായ കൊലപാതകമാണെന്ന് തെളിയുകയായിരുന്നു.

​സംഭവത്തെക്കുറിച്ച് പൊലീസ് പറയുന്നത്:

​കഴിഞ്ഞ 15-ന് വൈകിട്ട് ജോജി ജോണിന്റെ വീടിനു സമീപമുള്ള വീട്ടിലിരുന്ന് ഷിബുഖാനും സുഹൃത്ത് കുഞ്ഞുമോനും ജോജിയുടെ പിതാവും ചേർന്ന് മദ്യപിച്ചിരുന്നു. ഇതിനിടെ വീട്ടിലെത്തിയ ജോജിയോട്, ഷിബുഖാനും കുഞ്ഞുമോനും ചേർന്ന് തന്നെ ആക്രമിച്ചതായി അമ്മ പരാതിപ്പെട്ടു. ഇതിൽ പ്രകോപിതനായ ജോജി, അയൽവാസികളും സുഹൃത്തുക്കളുമായ മറ്റു പ്രതികളെക്കൂട്ടി ഇരുവരെയും ആക്രമിക്കുകയായിരുന്നു.

​പ്രതികൾ ചേർന്ന് ഷിബുഖാനെ തലകീഴായി നിലത്തടിച്ച് അതിക്രൂരമായി മർദിച്ചു. ആഘാതത്തിൽ തലയോട്ടി തകർന്ന് അസ്ഥി ഉള്ളിലേക്ക് തള്ളിക്കയറിയതാണ് മരണകാരണമെന്ന് പൊലീസ് വ്യക്തമാക്കി. മർദനം കണ്ട് ഭയന്നോടിയ സുഹൃത്ത് കുഞ്ഞുമോൻ രണ്ടു ദിവസം റബർത്തോട്ടത്തിൽ ഒളിവിൽ കഴിഞ്ഞ ശേഷം രാത്രിയോടെയാണ് സ്വന്തം വീട്ടിലെത്തിയത്. തുടർന്ന് ഇയാളെ പൊലീസ് കസ്റ്റഡിയിലെടുത്ത് വിവരങ്ങൾ ശേഖരിച്ചു.

​ബുധനാഴ്ച രാവിലെ കുഞ്ഞുമോനെ തിരക്കി ഇറങ്ങിയ ഭാര്യാമാതാവ് ചിന്നമ്മയാണ് തൊട്ടടുത്ത പുരയിടത്തിൽ ഷിബുഖാന്റെ മൃതദേഹം ആദ്യം കണ്ടത്. മർദനം തടയാൻ ശ്രമിച്ചെങ്കിലും അക്രമിസംഘം പിന്മാറിയില്ലെന്ന് ചിന്നമ്മ പറഞ്ഞു. നരഹത്യയ്ക്കാണ് പൊലീസ് കേസെടുത്തിരിക്കുന്നത്.

​കാഞ്ഞിരപ്പള്ളി ഡിവൈഎസ്‌പി യു. ശ്രീജിത്തിന്റെ നിർദേശപ്രകാരം എരുമേലി ഇൻസ്‌പെക്ടർ എം.ആർ. സുരേഷിന്റെ നേതൃത്വത്തിലുള്ള പ്രത്യേക സംഘമാണ് പ്രതികളെ വലയിലാക്കിയത്. മണിമല എസ്എച്ച്ഒ പ്രദീപ്, എസ്ഐമാരായ ജിബീഷ് ശശികുമാർ, സിജി കുട്ടപ്പൻ, സിവിൽ പൊലീസ് ഓഫിസർമാരായ ബോബി ശ്രീജിത്ത്, സെൽവരാജ്, അരുൺ, അനീഷ്, റഫീക്ക്, രഞ്ജിത്ത് നായർ എന്നിവരും അന്വേഷണ സംഘത്തിലുണ്ടായിരുന്നു.