ഓണവിളംബരവുമായി തലസ്ഥാന നഗരിയിൽ സൈക്കിൾ റാലി

ഓണം വാരാഘോഷം: തിരുവനന്തപുരത്ത് ആവേശം വിതറി സൈക്കിൾ റാലി

​തിരുവനന്തപുരം: സംസ്ഥാന സർക്കാരും ടൂറിസം വകുപ്പും സംയുക്തമായി സംഘടിപ്പിക്കുന്ന ഈ വർഷത്തെ ഓണം ടൂറിസം വാരാഘോഷത്തിന്റെ വിളംബരമറിയിച്ച് തിരുവനന്തപുരം നഗരത്തിൽ വർണ്ണാഭമായ സൈക്കിൾ റാലി നടന്നു. ഓണം പബ്ലിസിറ്റി കമ്മിറ്റിയുടെ നേതൃത്വത്തിൽ സംഘടിപ്പിച്ച റാലി പബ്ലിസിറ്റി കമ്മിറ്റി ചെയർമാൻ എം. ആർ. ബൈജു എം.എൽ.എ ഫ്ലാഗ് ഓഫ് ചെയ്തു.

​മാനവീയം വീഥിയിൽ നിന്ന് ആരംഭിച്ച റാലി മ്യൂസിയം, പാളയം, സ്റ്റാച്യു വഴി കിഴക്കേക്കോട്ട ഗാന്ധി പാർക്കിൽ സമാപിച്ചു. നൂറോളം സൈക്ലിസ്റ്റുകളാണ് നഗരത്തിന് ആവേശമായ റാലിയിൽ അണിനിരന്നത്.

​മുൻവർഷങ്ങളേക്കാൾ വിപുലമായ രീതിയിലാണ് ഇത്തവണത്തെ ഓണാഘോഷ പരിപാടികൾ ആസൂത്രണം ചെയ്തിരിക്കുന്നതെന്ന് ഫ്ലാഗ് ഓഫ് നിർവ്വഹിച്ച് എം.ആർ. ബൈജു എം.എൽ.എ പറഞ്ഞു. വാരാഘോഷത്തിന് മുന്നോടിയായി ജില്ലയിലെ 14 നിയോജകമണ്ഡലങ്ങളിലൂടെയും പതാക ഘോഷയാത്ര കടന്നുപോകും. ആഗസ്റ്റ് 21, 22, 23 തീയതികളിലാണ് പതാക ഘോഷയാത്ര നിശ്ചയിച്ചിരിക്കുന്നത്.

​കേരള സ്റ്റേറ്റ് സ്പോർട്സ് കൗൺസിൽ, സ്പോർട്സ് അതോറിറ്റി ഓഫ് ഇന്ത്യ, ട്രിവാൻഡ്രം ബൈക്കേഴ്സ് ക്ലബ്ബ്, ഇൻഡസ് സൈക്ലിംഗ് എംബസി എന്നിവ വഴി രജിസ്റ്റർ ചെയ്ത കായികപ്രേമികളാണ് റാലിയിൽ പങ്കെടുത്തത്. കെ.ടി.ഡി.സി, ഡി.ടി.പി.സി, നശാ മുക്ത് ഭാരത് അഭിയാൻ, ഫിറ്റ് ഇന്ത്യ എന്നിവയുടെ സഹകരണത്തോടെയായിരുന്നു സംഘാടനം.

​ചടങ്ങിൽ പാളയം കൗൺസിലർ ഷേർലി എസ്, ടൂറിസം വകുപ്പ് ഡെപ്യൂട്ടി ഡയറക്ടർ ശ്രീകുമാർ ജി. തുടങ്ങിയ പ്രമുഖർ പങ്കെടുത്തു.