കൊച്ചിയിലെ വെള്ളക്കെട്ടിന് പൂർണ്ണപരിഹാരം ഓപ്പറേഷൻ ബ്രേക്ക്ത്രൂ
എറണാകുളം നഗരത്തിലെ വെള്ളക്കെട്ട് ഒഴിവാക്കാൻ ഓപ്പറേഷൻ ബ്രേക്ക്ത്രൂ സമഗ്ര പദ്ധതിയുമായി ജില്ലാ ഭരണകൂടം. മുല്ലശ്ശേരി കനാൽ നവീകരണം മാർച്ചിൽ പൂർത്തിയാക്കും.
അനില എം കൃഷ്ണൻ 
കൊച്ചിയിൽ വെള്ളക്കെട്ട് ഒഴിവാക്കാൻ കർശന നടപടി; നിർണ്ണായക തീരുമാനങ്ങളുമായി 'ഓപ്പറേഷൻ ബ്രേക്ക്ത്രൂ'
കൊച്ചി: നഗരത്തിലെ വിട്ടുമാറാത്ത വെള്ളക്കെട്ടിന് ശാശ്വത പരിഹാരം കാണുന്നതിനായി 'ഓപ്പറേഷൻ ബ്രേക്ക്ത്രൂ' പദ്ധതിക്ക് കീഴിൽ നിർണ്ണായക തീരുമാനങ്ങളുമായി ജില്ലാ ഭരണകൂടം. ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ ചേർന്ന സമഗ്ര അവലോകന യോഗത്തിലാണ് പ്രധാന തീരുമാനങ്ങൾ കൈക്കൊണ്ടത്.
നഗരത്തിലെ പ്രധാന കനാലുകളുടെ പുനരുദ്ധാരണവും വെള്ളക്കെട്ട് പ്രതിരോധ പ്രവർത്തനങ്ങളും വേഗത്തിലാക്കാൻ യോഗത്തിൽ നിർദ്ദേശം നൽകി.
പ്രധാന തീരുമാനങ്ങളും പുരോഗതിയും:
മുല്ലശ്ശേരി കനാൽ നവീകരണം: കനാൽ നവീകരണ ജോലികൾ സെപ്റ്റംബർ ഒന്നിന് പുനരാരംഭിക്കും. വരുന്ന മാർച്ച് മാസത്തിനുള്ളിൽ നിർമ്മാണം പൂർത്തിയാക്കാൻ കളക്ടർ നിർദ്ദേശം നൽകി.
കെ.എസ്.ആർ.ടി.സി ഡിപ്പോ പരിസരം: ഡിപ്പോ പരിസരത്തെ കാനകളിലെ മാലിന്യം അടിയന്തരമായി നീക്കം ചെയ്യും. കാനകൾക്ക് മുകളിൽ നിയമവിരുദ്ധമായി പ്രവർത്തിക്കുന്ന കടകൾ മാറ്റിസ്ഥാപിക്കാൻ കൊച്ചി കോർപ്പറേഷന് നിർദ്ദേശം നൽകി.
വിവിധ പ്രദേശങ്ങളിലെ ജോലികൾ:
ടി.പി. കനാൽ & ഹൈക്കോടതി പരിസരം: ടി.പി. കനാലിന്റെ മൗത്ത് ക്ലീനിങ്ങും ഹൈക്കോടതി പരിസരത്തെ വെള്ളക്കെട്ട് പരിഹരിക്കാനുള്ള പി.ഡബ്ല്യു.ഡി ജോലികളും പൂർത്തിയായി.
ഇന്ദിരാനഗർ & ജോസ് ജങ്ഷൻ: ഇന്ദിരാനഗറിൽ ഷട്ടറുകൾ സ്ഥാപിച്ചു, റോഡ് ഉയർത്താനുള്ള ടെൻഡർ പൂർത്തിയായി. ജോസ് ജങ്ഷൻ, ടി.ഡി. റോഡ് എന്നിവിടങ്ങളിലെ പ്രവൃത്തികളും പൂർത്തിയായിട്ടുണ്ട്.
ഒബ്റോൺ മാൾ & കമ്മട്ടിപ്പാടം: ഇടപ്പള്ളി ഒബ്റോൺ മാൾ പരിസരത്ത് ബോക്സ് കൽവർട്ട് പണികൾ പൂർത്തിയായി. കമ്മട്ടിപ്പാടത്തെ ബോക്സ് കൽവർട്ട് ടെൻഡറിംഗ് വൈകുന്നതിൽ റെയിൽവേയോട് റിപ്പോർട്ട് തേടി. എം.ജി. റോഡിലെ സെൻട്രൽ മാൾ പരിസരത്തെ പ്രശ്നത്തിൽ ഉടൻ പരിഹാരം കാണാൻ പി.ഡബ്ല്യു.ഡിക്ക് നിർദ്ദേശം നൽകി.
മാലിന്യ സംസ്കരണത്തിൽ പുതിയ നിബന്ധനകൾ
ഓടകളും കനാലുകളും വൃത്തിയാക്കുമ്പോൾ നീക്കം ചെയ്യുന്ന എക്കലും ചെളിയും വഴിയോരങ്ങളിൽ നിക്ഷേപിക്കാൻ പാടില്ലെന്ന് കളക്ടർ വ്യക്തമാക്കി. കരാർ നൽകുന്ന ഘട്ടത്തിൽ തന്നെ ഇവ 'സിൽറ്റ് യാർഡിലേക്ക്' മാറ്റുന്നുണ്ടെന്ന് മൈനർ ഇറിഗേഷനും കൊച്ചി കോർപ്പറേഷനും ഉറപ്പാക്കണം.
കൂടാതെ, നിരോധിച്ച സിംഗിൾ യൂസ് പ്ലാസ്റ്റിക് ഉത്പന്നങ്ങളുടെ ഉറവിടങ്ങൾ കണ്ടെത്തി പരിശോധന ശക്തമാക്കാനും നിയമലംഘകരിൽ നിന്ന് വൻ തുക പിഴ ഈടാക്കാനും കൊച്ചി കോർപ്പറേഷൻ സെക്രട്ടറിക്ക് കളക്ടർ നിർദ്ദേശം നൽകി.
യോഗത്തിൽ അമിക്കസ് ക്യൂറി ഗോവിന്ദ് പദ്മനാഭൻ, ദുരന്തനിവാരണ വിഭാഗം ഡെപ്യൂട്ടി കളക്ടർ ജോസഫ് സ്റ്റീഫൻ റോബി, കൊച്ചി കോർപ്പറേഷൻ സെക്രട്ടറി പി. എസ്. ഷിബു തുടങ്ങിയ ഉന്നത ഉദ്യോഗസ്ഥർ പങ്കെടുത്തു.
