മുഖ്യമന്ത്രി പദമില്ലെങ്കിൽ മന്ത്രിസഭയിലേക്കില്ല വി.ഡി സതീശൻ കടുത്ത നിലപാടിലേക്ക്
യു.ഡി.എഫ് അധികാരത്തിൽ വരുന്ന പക്ഷം മുഖ്യമന്ത്രി സ്ഥാനം ലഭിച്ചില്ലെങ്കിൽ മന്ത്രിസഭയുടെ ഭാഗമാകേണ്ടതില്ലെന്ന് വി.ഡി. സതീശൻ വിഭാഗം. ഹൈക്കമാൻഡിനെ നിലപാടറിയിച്ചതായി സൂചന.
അനില എം കൃഷ്ണൻ 
തിരുവനന്തപുരം: കേരളത്തിൽ യു.ഡി.എഫ് അധികാരത്തിലേറുന്ന പക്ഷം മുഖ്യമന്ത്രി പദത്തെ ചൊല്ലി കോൺഗ്രസിനുള്ളിൽ തർക്കം മുറുകുന്നു. മുഖ്യമന്ത്രി സ്ഥാനം ലഭിച്ചില്ലെങ്കിൽ മന്ത്രിസഭയിലേക്കില്ലെന്ന കർശന നിലപാടിലേക്ക് വി.ഡി. സതീശൻ വിഭാഗം നീങ്ങുന്നതായാണ് പുറത്തുവരുന്ന സൂചനകൾ. ഇക്കാര്യം സതീശൻ പക്ഷം ഹൈക്കമാൻഡിനെ ഔദ്യോഗികമായി അറിയിച്ചിട്ടുണ്ട്.
കഴിഞ്ഞ അഞ്ച് വർഷക്കാലം പ്രതിപക്ഷ നേതാവെന്ന നിലയിൽ സർക്കാരിനെതിരായ പോരാട്ടങ്ങൾക്ക് നേതൃത്വം നൽകിയതും ജനകീയ ബദലുകൾ നിർദ്ദേശിച്ചതും വി.ഡി. സതീശനാണെന്നും, അതിനാൽ തന്നെ ഭരണപരമായ പരിമിതിയുള്ള മറ്റ് വകുപ്പുകൾ ഏറ്റെടുത്ത് മന്ത്രിസഭയിൽ തുടരുന്നതിൽ താല്പര്യമില്ലെന്നുമാണ് അദ്ദേഹത്തെ അനുകൂലിക്കുന്നവരുടെ വാദം. സതീശൻ മുന്നോട്ടുവെച്ച വികസന മാതൃകകൾ നടപ്പിലാക്കാൻ മുഖ്യമന്ത്രി പദം തന്നെ വേണമെന്നാണ് ഇവരുടെ നിലപാട്.
പകുതിയിലേറെ എം.എൽ.എമാരുടെ പിന്തുണ തങ്ങൾക്കുണ്ടെന്ന് സതീശൻ വിഭാഗം അവകാശപ്പെടുന്നു. ഹൈക്കമാൻഡ് പ്രതിനിധികളായ മുകുൾ വാസ്നിക്കും അജയ് മാക്കനും എം.എൽ.എമാരെ നേരിട്ട് കണ്ട് അഭിപ്രായം തേടണമെന്നും, ഈ പ്രക്രിയയിൽ കേരളത്തിന്റെ ചുമതലയുള്ള ദീപാദാസ് മുൻഷി ഇടപെടരുതെന്നും അവർ ആവശ്യപ്പെട്ടിട്ടുണ്ട്.
അതേസമയം, എ ഗ്രൂപ്പിന്റെ പിന്തുണയോടെ രമേശ് ചെന്നിത്തലയും രംഗത്തുണ്ട്. ഡൽഹിയിലെത്തി ഹൈക്കമാൻഡുമായി ചർച്ച നടത്തിയ ചെന്നിത്തല, ഭൂരിഭാഗം എം.എൽ.എമാരും തനിക്കൊപ്പമാണെന്ന പ്രതീക്ഷയിലാണ്. കെ.സി. വേണുഗോപാലിന്റെ പേരും സജീവമായി ചർച്ചയിലുണ്ട്. ഹൈക്കമാൻഡിന്റെ അന്തിമ തീരുമാനം എന്താകുമെന്ന ആകാംക്ഷയിലാണ് കേരളത്തിലെ കോൺഗ്രസ് നേതൃത്വവും പ്രവർത്തകരും
