ഗുരുവായൂർ ദേവസ്വം ഓഡിറ്റിൽ ഗുരുതര പോരായ്മകൾ ഹൈക്കോടതി

ഗുരുവായൂർ ദേവസ്വം ഓഡിറ്റിൽ ഗുരുതര പോരായ്മകൾ; ഡിജിറ്റൽ ഇടപാടുകൾ സുതാര്യമാക്കാൻ ഹൈക്കോടതി നിർദേശം

​കൊച്ചി: ഗുരുവായൂർ ദേവസ്വത്തിന്റെ ഓൺലൈൻ വഴിപാടുകളിലും ഡിജിറ്റൽ പണമിടപാടുകളിലും ഗുരുതരമായ പോരായ്മകളുണ്ടെന്ന് ഹൈക്കോടതി. ഡിജിറ്റൽ പണമിടപാടുകളുടെ കൃത്യമായ അക്കൗണ്ടിങ് ഉറപ്പാക്കാനുള്ള സംവിധാനം നിലവിലില്ലെന്ന സംസ്ഥാന ഓഡിറ്റ് വിഭാഗത്തിന്റെ റിപ്പോർട്ടിന്റെ അടിസ്ഥാനത്തിലാണ് ഹൈക്കോടതിയുടെ കർശന വിമർശനം. ദേവസ്വത്തിന്റെ സാമ്പത്തിക-ഭരണ സംവിധാനങ്ങൾ പൂർണമായും ഡിജിറ്റലാക്കാൻ വിദഗ്ധ സ്ഥാപനത്തെ നിയോഗിക്കാനും കോടതി നിർദേശിച്ചു.

​ജസ്റ്റിസുമാരായ വി. രാജ വിജയരാഘവൻ, കെ.വി. ജയകുമാർ എന്നിവരടങ്ങുന്ന ദേവസ്വം ബെഞ്ചിന്റേതാണ് ഉത്തരവ്. വരവ്, ചെലവ്, വഴിപാടുകൾ, കരാറുകൾ, സ്റ്റോക്ക്, സ്വത്തുക്കൾ എന്നിവയെല്ലാം തത്സമയം നിരീക്ഷിക്കാൻ കഴിയുന്ന സമഗ്ര ഡിജിറ്റൽ സംവിധാനം നടപ്പാക്കാനുള്ള സാധ്യത പരിശോധിക്കണമെന്നും കോടതി ആവശ്യപ്പെട്ടു.

​ഓഡിറ്റ് റിപ്പോർട്ടിലെ ഞെട്ടിക്കുന്ന കണ്ടെത്തലുകൾ:

​പണമിടപാടുകളിൽ അവ്യക്തത: ഓൺലൈൻ വഴിപാടുകൾ, പിഒഎസ് മെഷീനുകൾ, ക്യൂആർ കോഡ് വഴിയുള്ള ഇ-ഹുണ്ടി, കാർഡ് പേയ്മെന്റുകൾ എന്നിവയിലൂടെ ലഭിക്കുന്ന തുകയുടെ കൃത്യമായ അക്കൗണ്ടിങ് ഉറപ്പാക്കാൻ സംവിധാനമില്ല. ഭക്തർക്ക് നൽകിയ രസീതിന്റെ റീപ്രിന്റ് സൗകര്യം സംബന്ധിച്ച് വിശദീകരണം തേടിയെങ്കിലും ദേവസ്വം മറുപടി നൽകിയില്ല.

​തീർപ്പാക്കാത്ത ഓഡിറ്റ് ഒബ്ജക്ഷനുകൾ: 2011-12 മുതൽ 2019-20 വരെയുള്ള കാലയളവിൽ 54.59 കോടിയുടെ ഓഡിറ്റ് ഒബ്ജക്ഷൻ ഉന്നയിച്ചെങ്കിലും ഇതുവരെ വിശദീകരണം നൽകിയിട്ടില്ല. 107.92 കോടിയിലധികം രൂപ നഷ്ടമായി കണക്കാക്കിയ തുകയും തീർപ്പാക്കിയിട്ടില്ല.

​43 വർഷമായി സ്വർണ പരിശോധനയില്ല: ക്ഷേത്രത്തിലെ സ്വർണം, ആഭരണങ്ങൾ, മറ്റ് വിലപിടിപ്പുള്ള വസ്തുക്കൾ എന്നിവയുടെ വാർഷിക ഭൗതിക പരിശോധന 43 വർഷമായി നടത്തിയിട്ടില്ല. വിലയേറിയ വഴിപാടുകളായ വെങ്കല പാത്രങ്ങൾ, കശ്മീരി കുങ്കുമപ്പൂ തുടങ്ങിയവ പോലും കൃത്യമായി റജിസ്റ്ററുകളിൽ രേഖപ്പെടുത്തുന്നില്ലെന്നും ഓഡിറ്റ് വിഭാഗം ചൂണ്ടിക്കാട്ടുന്നു.

​ഈ ഗുരുതര വീഴ്ചകളുടെ പശ്ചാത്തലത്തിൽ, നിലവിലെ ഓഡിറ്റിന്റെ സ്ഥിതി അറിയിക്കാൻ സംസ്ഥാന ഓഡിറ്റ് വിഭാഗം സീനിയർ ഡപ്യൂട്ടി ഡയറക്ടറോട് നാളെ നേരിട്ട് ഹാജരാകാൻ കോടതി നിർദേശിച്ചിട്ടുണ്ട്.