ഓവർലോഡ് കേസുകളിൽ മോട്ടോർ വാഹന വകുപ്പിന് അനുകൂല വിധി വാഹന ഉടമകൾക്കും ഡ്രൈവർമാർക്കുമായി 3.43 ലക്ഷം രൂപ പിഴ
എറണാകുളത്ത് അനുവദനീയമായ പരിധിയിൽ കൂടുതൽ ഭാരം കയറ്റിയ നാല് ഓവർലോഡ് കേസുകളിൽ വാഹന ഉടമകളിൽ നിന്നും ഡ്രൈവർമാരിൽ നിന്നുമായി 3.43 ലക്ഷം രൂപ പിഴ ഈടാക്കാൻ കോടതി ഉത്തരവ്.
അനില എം കൃഷ്ണൻ 
കൊച്ചി: സംസ്ഥാനത്ത് അനുവദനീയമായ പരിധിയിൽ കൂടുതൽ ഭാരം കയറ്റി സർവീസ് നടത്തിയ വാഹനങ്ങൾക്കെതിരെ മോട്ടോർ വാഹന വകുപ്പ് (MVD) സ്വീകരിച്ച നടപടികൾ ശരിവെച്ച് കോടതി ഉത്തരവ്. നാല് ഓവർലോഡ് കേസുകളിലായി ആകെ 3,43,500 രൂപ പിഴയാണ് എറണാകുളം അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതി വിധിച്ചത്.
അഡീഷണൽ ചീഫ് ജുഡീഷ്യൽ മജിസ്ട്രേറ്റ് മേരി ബിന്ദു ഫെർണാണ്ടസ് അധ്യക്ഷയായ ബെഞ്ചാണ് നിർണായക വിധി പ്രസ്താവിച്ചത്. നിയമലംഘനം നടത്തിയ വാഹന ഉടമകളിൽ നിന്ന് 1,71,000 രൂപയും, ഡ്രൈവർമാരിൽ നിന്ന് 1,72,500 രൂപയും പിഴയായി ഈടാക്കും.
വിവിധ കേസുകളിലെ പിഴ വിവരങ്ങൾ
ഒന്നാം കേസ് (KL 35 J 9824): വാഹനത്തിന്റെ ഉടമയ്ക്കും ഡ്രൈവർക്കും 56,000 രൂപ വീതം ആകെ 1,12,000 രൂപ.
രണ്ടാം കേസ് (KL 52 R 1006): വാഹനത്തിന്റെ ഉടമയ്ക്കും ഡ്രൈവർക്കും 64,000 രൂപ വീതം ആകെ 1,28,000 രൂപ.
മൂന്നാം കേസ് (KL 17 W 6382): വാഹനത്തിന്റെ ഉടമയ്ക്കും ഡ്രൈവർക്കും 42,000 രൂപ വീതം ആകെ 84,000 രൂപ.
നാലാം കേസ് (KL 07 BY 657): വാഹന ഉടമയ്ക്ക് 9,000 രൂപയും ഡ്രൈവർക്ക് 10,500 രൂപയും ഉൾപ്പെടെ ആകെ 19,500 രൂപ.
അനുവദനീയമായ പരിധിയേക്കാൾ അധികഭാരം കയറ്റി ചരക്ക് ഗതാഗതം നടത്തുന്നത് റോഡ് സുരക്ഷയ്ക്ക് കടുത്ത ഭീഷണിയാകുമെന്നും, ഇത്തരം നിയമലംഘനങ്ങൾക്കെതിരെ വരും ദിവസങ്ങളിലും ശക്തമായ നടപടികൾ തുടരുമെന്നും അധികൃതർ വ്യക്തമാക്കി. നിയമലംഘനം നടത്തുന്ന വാഹന ഉടമകൾക്കും ഡ്രൈവർമാർക്കുമെതിരെ പരിശോധനകൾ കർശനമാക്കാനും ഒപ്പം ബോധവൽക്കരണ പരിപാടികൾ സംഘടിപ്പിക്കാനും തീരുമാനിച്ചതായി എറണാകുളം ആർ.ടി.ഒ (എൻഫോഴ്സ്മെന്റ്) അറിയിച്ചു.
