എം.കെ. സാനു മാഷ് മലയാള ഭാഷയുടെയും സംസ്കാരത്തിന്റെയും ജ്വലിക്കുന്ന ഗുരുനാഥൻ മുഖ്യമന്ത്രി വി.ഡി. സതീശൻ

എം.കെ. സാനു മാഷ് മലയാള ഭാഷയുടെയും സംസ്കാരത്തിന്റെയും ജ്വലിക്കുന്ന ഗുരുനാഥൻ: മുഖ്യമന്ത്രി വി.ഡി. സതീശൻ

എറണാകുളം: അറിവുതേടിയുള്ള നിരന്തര യാത്രയിലൂടെ മലയാള ഭാഷയെയും സംസ്കാരത്തെയും എന്നും ജ്വലിപ്പിച്ചു നിർത്തിയ മഹാനായ ഗുരുനാഥനാണ് പ്രൊഫ. എം.കെ. സാനു മാഷെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. എം.കെ. സാനു ഫൗണ്ടേഷനും ചാവറ കൾച്ചറൽ സെന്ററും സംയുക്തമായി സംഘടിപ്പിച്ച സാനു മാഷ് അനുസ്മരണ സമ്മേളനം എറണാകുളത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

​സാനു മാഷ് അവസാനമായി രചിച്ച് എൻ.ബി.എസ്. പ്രസിദ്ധീകരിച്ച 'ഞാൻ മരണാനുരാഗബന്ധൻ' എന്ന ഗ്രന്ഥത്തിന്റെ പ്രകാശന കർമ്മവും ചടങ്ങിൽ മുഖ്യമന്ത്രി നിർവ്വഹിച്ചു. തന്റെ ഹൃദയത്തിലെ ഗുരുനാഥന്റെ അവസാന പുസ്തകം പ്രകാശനം ചെയ്യാൻ സാധിച്ചത് ജീവിതത്തിലെ ഏറ്റവും വലിയ ഭാഗ്യമായി കരുതുന്നുവെന്ന് അദ്ദേഹം വികാരാധീതനായി പറഞ്ഞു.

​ഓർമ്മകളിൽ നിറഞ്ഞ് ആത്മബന്ധം

തന്റെ ഇരുപത്തൊന്നാം വയസ്സിൽ എം.ജി. സർവ്വകലാശാല യൂണിയൻ ചെയർമാനായിരുന്ന കാലം മുതൽ സാനു മാഷുമായി തുടരുന്ന ആത്മബന്ധം മുഖ്യമന്ത്രി അനുസ്മരിച്ചു. ഔദ്യോഗിക വിദ്യാർത്ഥിയായിരുന്നില്ലെങ്കിലും ചെറുപ്പം മുതൽ ഹൃദയത്തിൽ ഗുരുവിന്റെ സ്ഥാനത്താണ് സാനു മാഷിനെ പ്രതിഷ്ഠിച്ചിട്ടുള്ളതെന്ന് അദ്ദേഹം കൂട്ടിച്ചേർത്തു. ലോക സാഹിത്യത്തിലെ വിവിധ വിഷയങ്ങളെക്കുറിച്ചും കഥാപാത്രങ്ങളെക്കുറിച്ചും അപാരമായ ഓർമ്മശക്തിയോടെ സംസാരിക്കാനുള്ള മാഷിന്റെ കഴിവ് പ്രശംചനാർഹമാണ്. പ്രഭാഷണത്തിലും എഴുത്തിലും പകരക്കാരനില്ലാത്ത വ്യക്തിത്വമായിരുന്നു അദ്ദേഹത്തിന്റേത്. വായനക്കാരെയും കേൾവിക്കാരെയും ഒരുപോലെ പ്രചോദിപ്പിക്കാൻ അദ്ദേഹത്തിന് സാധിച്ചിരുന്നു.

​ചങ്ങമ്പുഴ കൃഷ്ണപിള്ളയുടെ 'നക്ഷത്രങ്ങളുടെ സ്നേഹഭാജനം' എന്ന പുസ്തകം വായിച്ച ശേഷമാണ് താൻ ചങ്ങമ്പുഴ കവിതകൾ മുഴുവൻ തേടിപ്പിടിച്ചു വായിച്ചതെന്ന് മുഖ്യമന്ത്രി ഓർത്തെടുത്തു. വൈക്കം മുഹമ്മദ് ബഷീറിനെക്കുറിച്ചുള്ള 'ഏകാന്ത വീഥിയിലെ അവധൂതൻ', ആത്മകഥയായ 'കർമ്മഗതി' തുടങ്ങിയ കൃതികൾ മലയാള സാഹിത്യത്തിലെ എക്കാലത്തെയും മികച്ച ഏടുകളാണെന്നും അദ്ദേഹം വിശേഷിപ്പിച്ചു.

​ചടങ്ങിൽ പ്രമുഖരുടെ സാന്നിധ്യം

സാനു മാഷിന്റെ മക്കളായ എം. എസ്. രഞ്ജിത്ത്, എം. എസ് രേഖ, എം. എസ് ഗീത, എം. എസ് ഹരീഷ് എന്നിവർ ചേർന്ന് മുഖ്യമന്ത്രിയിൽ നിന്ന് പുസ്തകം ഏറ്റുവാങ്ങി. എം.കെ. സാനു ഫൗണ്ടേഷൻ ചെയർമാൻ പ്രൊഫ. എം. തോമസ് മാത്യു ചടങ്ങിൽ അധ്യക്ഷത വഹിച്ചു. പ്രമുഖ സാഹിത്യകാരനും എം.പിയുമായ അബ്ദുസ്സമദ് സമദാനി അനുസ്മരണ പ്രഭാഷണം നടത്തി.

​ടി.ജെ. വിനോദ് എം.എൽ.എ., കൊച്ചി കോർപ്പറേഷൻ കൗൺസിലർ കെ.വി.പി. കൃഷ്ണകുമാർ, ചാവറ കൾച്ചറൽ സെന്റർ ഡയറക്ടർ ഫാ. അനിൽ ഫിലിപ്പ് സി.എം.ഐ, എം.കെ. സാനു ഫൗണ്ടേഷൻ വൈസ് ചെയർമാൻ രഞ്ജിത്ത് സാനു, ചാവറ കൾച്ചറൽ സെന്റർ അസി. ഡയറക്ടർ ഫാ. എബിൻ പുളിക്കതൊട്ടിൽ സി.എം.ഐ തുടങ്ങിയവർ അനുസ്മരണ സന്ദേശം നൽകി.