സ്കൂൾ ഉച്ചഭക്ഷണത്തിന് ഇനി മട്ട അരി നൽകാൻ നടപടിയുമായി സർക്കാർ മന്ത്രി അനൂപ് ജേക്കബ്
സംസ്ഥാനത്ത് വിലക്കയറ്റം നിയന്ത്രിക്കുന്നതിന്റെ ഭാഗമായി റേഷൻ കടകൾ വഴി ഒഎംഎസ്എസ് സ്പെഷൽ അരി വിതരണം ചെയ്യുന്നത് തുടരുമെന്ന് ഭക്ഷ്യമന്ത്രി അനൂപ് ജേക്കബ്. ക്രിസ്മസ് പുതുവത്സര കാലയളവിൽ പ്രത്യേക പച്ചരി വിതരണം ചെയ്യാനും തിരുവനന്തപുരത്ത് ചേർന്ന ഉന്നതതല യോഗത്തിൽ തീരുമാനമായി.
Angel Varghese 
വിലക്കയറ്റം തടയാൻ ക്രിസ്മസിനും സ്പെഷൽ പച്ചരി; ഒഎംഎസ്എസ് അരി വിതരണം തുടരുമെന്ന് മന്ത്രി അനൂപ് ജേക്കബ്
തിരുവനന്തപുരം: സംസ്ഥാനത്ത് വിപണിയിലെ വിലക്കയറ്റം ഫലപ്രദമായി തടയുന്നതിനായി ഓപ്പൺ മാർക്കറ്റ് സെയിൽസ് സ്കീം (OMSS) വഴിയുള്ള സ്പെഷൽ അരി വിതരണം തുടർച്ചയായി ലഭ്യമാക്കുന്നത് പരിഗണിക്കുമെന്ന് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ് അറിയിച്ചു. ഓണക്കാലത്ത് ആരംഭിച്ച അരി വിതരണം ഈ മാസവും തുടരും. വരുന്ന ക്രിസ്മസ്-പുതുവത്സര ആഘോഷ കാലയളവിൽ പൊതുജനങ്ങൾക്ക് റേഷൻ കടകൾ വഴി സ്പെഷൽ പച്ചരി ലഭ്യമാക്കാനും തീരുമാനമായിട്ടുണ്ട്.
ഇതുമായി ബന്ധപ്പെട്ട് ഫുഡ് കോർപ്പറേഷൻ ഓഫ് ഇന്ത്യ (FCI) ഉദ്യോഗസ്ഥരുമായി ആദ്യഘട്ട ചർച്ചകൾ പൂർത്തിയായി. ക്രിസ്മസ് വിപണി ലക്ഷ്യമിട്ട് നൽകുന്ന പച്ചരിയുടെ വിഹിതവും അത് ലഭിക്കുന്ന വിഭാഗങ്ങളും ഉടൻ തന്നെ തീരുമാനിക്കുമെന്ന് മന്ത്രി വ്യക്തമാക്കി. ഓണക്കാലത്തെ സ്പെഷൽ അരി വിൽപ്പന വിശകലനം ചെയ്ത് റിപ്പോർട്ട് നൽകാൻ സിവില് സപ്ലൈസ് അധികൃതർക്ക് നിർദേശം നൽകിയിട്ടുണ്ട്. റേഷൻ കടകളിലെ യഥാർത്ഥ ആവശ്യകതയും വിൽപ്പനയും കണക്കിലെടുത്തായിരിക്കും തുടർന്നുള്ള അരി വിതരണം പുനഃക്രമീകരിക്കുക.
അതേസമയം, സ്കൂൾ വിദ്യാർത്ഥികളുടെ ഉച്ചഭക്ഷണ പദ്ധതിക്കായി കുത്തരി (മട്ട അരി) നൽകുന്ന കാര്യവും സർക്കാർ സജീവമായി പരിഗണിക്കുന്നുണ്ട്. ഇതിനാവശ്യമായ അരി വിഹിതം വിട്ടുനൽകുന്നതിൽ തടസ്സങ്ങളില്ലെന്ന് യോഗത്തിൽ പങ്കെടുത്ത എഫ്.സി.ഐ ജനറൽ മാനേജർ അറിയിച്ചു. പൊതുവിതരണ മേഖലയിലെ പുതിയ തീരുമാനങ്ങൾ സംസ്ഥാനത്തെ സാധാരണക്കാർക്ക് ആശ്വാസമാകുമെന്നാണ് പ്രതീക്ഷിക്കുന്നത്. എഫ്.സി.ഐ, സിവില് സപ്ലൈസ് വകുപ്പുകളിലെ ഉന്നത ഉദ്യോഗസ്ഥർ യോഗത്തിൽ പങ്കെടുത്തു.
